Դեսպան Նազարյանի մասնակցությունը ՄԱԿ համաժողովին

30 հունիսի, 2022

Հունիսի 30-ին Պորտուգալիայում ՀՀ դեսպան Կարեն Նազարյանը ելույթով հանդես եկավ «Կայուն զարգացման 14-րդ նպատակի իրականացմանը նվիրված ՄԱԿ համաժողովում, որը տեղի է ունենում Լիսաբոնում և մեկտեղել է ՄԱԿ-ի անդամ պետությունների, միջազգային կառույցների ու հասարակական կազմակերպությունների ներկայացուցիչներին։ ՀՀ պատվիրակության ղեկավարն իր ելույթում նշեց, որ, չնայած համավարակով ու Լեռնային Ղարաբաղի հանդեպ սանձազերծված պատերազմով պայմանավորված դժվարությունների, Հայաստանը շարունակում է քայլեր ձեռնարկել կայուն զարգացման նպատակների իրականացման ուղղությամբ։ Համաժողովին Կ․ Նազարյանը ներկայացրել է «Հայաստանի վերափոխման ռազմավարություն 2050»-ի նպատակները, որոնք մեծապես կապված են կայուն զարգացման օրակարգին ու համաժամացվում են Հայաստանի ազգային առաջնայնությունների հետ։ Կարևորելով ՄԱԿ-ի ծովային իրավունքի մասին կոնվենցիայի հիմնարար դերը Կ․ Նազարյանն ընդգծել է, որ այն իրավունք է վերապահում դեպի ծով ելք չունեցող պետություններին ծովից ու դեպի ծով մուտքի և ազատ տարանցման համար, և կոչ ուղղել միջազգային համագործակցության միջոցով շարունակաբար ամրապնդել համընդհանուր բնույթի իրավական այս շրջանակը՝ անընդունելի համարելով դրա դրույթների խախտումները։

ՀՀ պատվիրակության ղեկավարը ՄԱԿ-ի, դրա անդամ պետությունների և քաղհասարակության գործընկերների միջև համագործակցության կարևոր գործիքակազմ է համարել ՅՈՒՆԵՍԿՕ-ի և Գալուստ Գյուլբենկյան հիմնադրամի հետ համատեղ իրականացվող տեղեկատվական քարոզարշավը, որը նպատակ է հետապնդում ստեղծել արդյունավետ հարթակ կայուն զարգացման օրակարգի նոր սերնդի իրականացնողների համար։

Հունիսի 29-ին ՀՀ պատվիրակության ղեկավարը որպես բանախոս մասնակցել է նաև համաժողովին զուգահեռ ընթացող բարձր մակարդակի ինտերակտիվ քննարկմանը։ Կ․ Նազարյանը որպես դեպի ծով ելք չունեցող երկրների խմբի բյուրոյի անդամ երկրի ներկայացուցիչ ներկայացրել է խմբի ընդհանուր դիրքորոշումն առ այն, որ օվկիանոսների, ծովերի և ծովային ռեսուրսների պահպանումն ու կայուն օգտագործումն էական է երկրագնդի էկոհամակարգի համար՝ անկախ աշխարհագրությունից, երկրների առափնյա հարթավայրային կամ լեռնային դիրքից, և այդ առումով կարևորել Վիեննայի գործողության ծրագրին համահունչ մարտահրավերների, հնարավորությունների և լավագույն փորձի շարունակական ուսումնասիրումը։

Հուլիսի 1-ին նախատեսվում է ՄԱԿ-ի համաժողովի քաղաքական հռչակագրի տեքստի պաշտոնական ընդունումը որպես ավելի վաղ կայացած միջկառավարական քննարկումների արդյունք։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր