Հայաստանյան ՀԿ-ների այցը Սուրբ Աթոռում ՀՀ դեսպանություն

17 հունիսի, 2022

Հունիսի 17-ին Սուրբ Աթոռում ՀՀ դեսպան Կարեն Նազարյանը հանդիպում ունեցավ հայաստանյան հասարակական կազմակերպությունների ներկայացուցիչների հետ, ովքեր դեսպանություն էին այցելել Հայաստանում ՄԱԿ-ի Բնակչության հիմնադրամի գրասենյակի ղեկավարի ուղեկցությամբ։

Հանդիպմանը ՀԿ ներկայացուցիչները դեսպանին են ներկայացրել սոցիալական պաշտպանության բնագավառում իրականացվող ծրագրերը։ Իր հերթին Կ․Նազարյանը խոսել է տվյալ ոլորտում Հայաստանում Սուրբ Աթոռին և կաթոլիկ եկեղեցուն հարող հումանիտար կառույցների գործունեության մասին ու առաջարկել դիտարկել գործընկերության ու համագործակցության հնարավորությունները՝ առավել արդյունավետ դարձնելու կյանքի դժվարին իրավիճակում հայտնված հայրենակիցների, մասնավորապես՝ Արցախից տեղահանված ընտանիքների սոցիալական հիմնախնդիրների մեղմանն ուղղված համատեղ ջանքերը։

Հայաստանյան ՀԿ-ները Հռոմ էին ժամանել մասնակցելու Ծերացման հարցերով նախարարական եռօրյա համաժողովին, որը կազմակերպել էր ՄԱԿ-ի Եվրոպական տնտեսական հանձնաժողովը, և որի նպատակներից էր նաև քննարկել ուղիներ՝ ծերացումը խնդրից հնարավորության վերափոխելու համար։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր