Անկախության օրվա առթիվ դեսպան Կարեն Նազարյանի շնորհավորականը

21 սեպտեմբերի, 2020

Սիրելի հայրենակիցներ,

Մեր հայրենիքի անկախության քսանիններորդ տարեդարձի առթիվ հղում եմ իմ սրտագին շնորհավորանքներն ու մաղթում նորանոր ձեռքբերումներ, երջանկություն և բարեկեցություն:

Գրեթե երեք տասնամյակ առաջ հայ ժողովուրդը վերահաստատեց ազատ ապրելու, սեփական ճակատագիրը տնօրինելու և խաղաղ արարելու իր դարավոր ձգտումը: Այսօր էլ, բռնելով զարգացման ու աննախադեպ բարեփոխումների ուղին, մեր երկիրը հաջողությամբ շարունակում է պետականաշինության դժվարին գործը՝ իր արժանի տեղը զբաղեցնելով պետությունների համաշխարհային մեծ ընտանիքում:

Համավարակով պայմանավորված այս անորոշ ժամանակաշրջանում իմ մաղթանքն է նաև, որպեսզի բոլորս շարունակենք նոր շունչ, նոր գաղափարներ հաղորդել, հատկապես մեր երիտասարդության առաջխաղացման համար։

Վստահ եմ, որ Հայաստան-Արցախ-Սփյուռք միասնությունը ամրապնդելով, պետականության հզորացման գաղափարի շուրջ համախմբվելով և ապավինելով մեր հարուստ քաղաքակրթական արժեքներին, ազգային ներուժին ու ամուր հավատքին, կարող ենք անել ավելին՝ հասնելու համար հայ ժողովրդի վեհ նպատակների իրագործմանը։

Տոնդ շնորհավո՜ր, Հայաստան։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր