Սուրբ Աթոռում ՀՀ դեսպան Կարեն Նազարյանի հարցազրույցը «Հեռանկար» հաղորդաշարին

25 մարտի, 2020

Հարց․ Դիվանագետները, և, մասնավորապես Դուք, դիվանագիտական ծառայությունները, արդյո՞ք աշխատում եք ամբողջ ծանրաբեռնվածությամբ։

Կարեն Նազարյան. Անշուշտ։ Աշխատանքն ընթանում է սովորականի համաձայն։ Երկու դեսպանություններում էլ գործում են թեժ գծեր։ Կապը մշտական է մեր քաղաքացիների հետ։ Որոշ դեպքերում անցնում ենք, այսպես ասած, հեռավար աշխատանքի, բայց և՛ դեսպանությունների, և՛ Երևանի միջև կապն անխափան է։

Հարց․ Ըստ Ձեզ, քանի՞ ՀՀ քաղաքացի հիմա կա Իտալիայում։

Կարեն Նազարյան. Նախ ասեմ, որ Հռոմում տեղակայված մեր զույգ դեսպանությունները մշտապես կապի մեջ են մեր հայրենակիցների հետ։ Արդեն տևական ժամանակ է, որ գործող թեժ գծերի միջոցով մեզ հասանելի են նրանց տվյալները, ժամանակավոր բնակության վայրերը։ Ունենք ուսանողներ, որոնք տեղակայված են Իտալիայի հյուսիսային շրջաններում, մենք նրանց հետ կապի մեջ ենք։ Ի դեպ, ասեմ, որ երիտասարդներից մեկը, իր փոխանցմամբ, արդեն իսկ ստացել է անհրաժեշտ բուժում և ամբողջական կազդուրման փուլն արդեն անցել է, մարտի 29-ին նախատեսվում է նրա վերադարձը հայրենիք։ Մեկ այլ թարմ օրինակ. ստացել ենք տեղեկատվություն ՀՀ քաղաքացուց, ով նավով երեկ ժամանել է Հռոմ։ Նավի վրա կան վարակվածներ, որի հետևանքով մեր քաղաքացին մյուս ուղևորների հետ մեկտեղ կենթարկվի բժշկական զննման և այդ գործընթացից անմիջապես հետո մենք կշարունակենք մեր քաղաքացու՝ դեպի տուն վերադարձի հարցում մեր խորհրդատվությունները և աշխատանքը։ Առհասարակ նշեմ, որ մինչև 70 ՀՀ քաղաքացիներ կան, որոնք ունեն նաև կացության թույլտվություն և այս պահին բնակվում են Իտալիայում։

Հարց․ Մեր քաղաքացիներից քանի՞սն են ցանկություն հայտնել վերադառնալ հայրենիք։

Կարեն Նազարյան. Մեր քաղաքացիներից ցանկություն հայտնեցին վերադառնալ, ինչպես գիտեք, 67-ը և նրանք արդեն վերադարձել են Հայաստան՝ չարթերային թռիչքի միջոցով, իսկ մնացածը տեղյակ էին թռիչքի մասին, բայց նրանց որոշումն էր դեռևս որոշակի ժամանակաշրջան մնալ Իտալիայում։ Ինչպես գիտեք, վերադարձը կամավոր էր և մենք այդ գործընթացն իրականացնում էինք մեր քաղաքացիների ցանկության համաձայն։

Հարցազրույցն ամբողջությամբ կարելի է դիտել` այցելելով https://www.shantnews.am/news/view/636106.html կայքը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր